Dárbbahat go fáhkkes veahki? Váldde oktavuođa bahkadasdoaktáriin 116 117
Jus don vásihat ahte don leat massán hálddu speallamis, de lea dehálaš ahte don oaččut veahki fágabargis. Massit hálddu mearkkaša ahte speallan lea ožžon duođalaš negatiiva čuozahusaid dutnje ovtta dahje máŋggaid osiin du eallimis, ovdamearkka dihte sosiála doaimmalašvuohta ja váilevaš fierpmádat, bargu, skuvla, ekonomiija, psyhkalaš, dovduičuohcci dahje fysalaš.
Deháleamos man sáhttá bargat lea ságastit soapmásiin. Ovdamearkka dihte sáhtát geavahit min, namalassii Davvi-Norgga universitehtabuohcceviesu čátta, gos don sáhtát čiegusin čáttet fágaolbmuiguin speallama ja speallanváttisvuođaid birra.
Don sáhtát oažžut beaktilis gieđahallama speallanváttisvuođaide máŋggaid báikkiin riikkas. Muhtin fálaldagat gáibidit čujuhusa fástadoaktáris, NAV:s dahje sosiálabálvalusas du gielddas.
Leat go eahpesihkkar gii du fástadoavttir lea? helsenorge.no sáhtát gávdnat gii lea, dahje molsut fástadoaktára.
Dieđut gieđahallama birra sierra báikkiin riikkas gávnnat hjelpelinjen.no
Mii dáhpáhuvvá gieđahallamis?
Guorahallan/gárten
Mii lávejit geavahit jearahallanskovi reaidun go gártet man duođalaš sorjavašvuohta lea. Gieđahalli sáhttá geavahit sierra lágan jearahallanskoviid gártet speallansorjavašvuođa. Jus gávdnet eará váttuid psyhkalaš dearvvašvuođain, dat guorahallo maid.
Terapevttalaš ságastallamat
Jus álggát gieđahallama de šiehtadalat gieđahalliin gallii galgabeahtti gávnnadit ságastallamiidda. Dát sáhttá rievdat du sávaldaga, gieđahalli árvvoštallama, eallindili, psyhkalaš dili mielde ja man duođalaš speallansorjavašvuohta lea. Gieđahallama álggus lea dábálaš gávnnadit oktii vahkkui dahje juohke nuppi vahku.
Ságastallamiid váldoulbmil lea veahkehit du gávnnahit manne speallan lea šaddan váddun dutnje ja iskkat jurdagiid ja dovdduid mat leat du speallanláhtttema vuođđun. Dan maŋŋil mii geahččat doaibmabijuid nu ahte rievdadit láhttema ja oažžut buoret kontrolla du impulssain praktihkalaš doaimmaiguin čadnon speallamii.
Mon háliidan geahččalit gieđahallat dán ámmátlaš veahki haga. Maid mon galggan bargat?
Ráhkat beaivái struktuvrra man sáhtát čuovvut. Pláne beivviid nu ahte šattat čađahit eará doaimmaid álggus, ovdal go soaittát sáhttit speallat ráddjeduvvon áiggi beaivvi loahpas jus lea áigi báhcán. Geahččal doalahit jándorritma. Mana oađđit fásta áiggi eahkes ja lihka fásta áiggi iđđedis. Fásta doaibma, nugo bargu, skuvla dahje eará beroštupmi sáhttá veahkehit ollu ráddjedit áigegolu spealuide.
Spillavhengighet.no
Máŋgasat dovdet ahte hupmat soapmásiin gii lea sullasaš dilis, dahje guhte juo lea čađahan dan maid don čađahat dál lea veahkkin. Spillavhengighet Norge doallá miellahttočoahkkimiid speallosorjavaččaide ja oapmahaččaide eanemus stuorra gávpogiin Norggas. Don sáhtát oaidnit vejolaš doarjjajoavkkuid siiddus spillavhengighet.no.